2005-jili avgust ayinan "Milliy g`a`rezsizlik ideyasi, huqi ha`m ruwxiyliq tiykarlari" kafedrasi bolip atala basladi.
Huqiqtaniw kafedrasi ashilip "O`zbekstan ha`m Qaraqalpakstan tariyxi" kafedrasinan bo`linip shiqti. Sol da`wirde kafedrag`a tariyx ilimleri kandidati, dotsent Q.Nayimov basshiliq etti. Kafedra ta`repinen "Konstitutsiyaliq huqiq", "Ma`mleket ha`m huqiq tariyxiy ha`m teoriyasi", "Miynet huqiqi", "Ha`kimshilik huqiqi", "Sem`ya huqiqi", "Puxaraliq huqiq", "Ekologiyaliq huqiq", "Huqiqtaniw" pa`nleri oqitildi.
"Milliy g`a`rezsizlik ideyasi ha`m ruwxiyliq tiykarlari" kafedrasi 2005-jili 9-avgustta ashildi ha`m og`an akademik J.Bazarbaev basshilik etti. 2005-2006 oqiw jilinda kafedrada 17 professor-oqitiwshi, sonnan 1 ilim doktori, 5 ilim kandidati, dotsent, 3 u`lken oqitiwshi, 8 assistent jumis isledi.
Kafedra professor-oqitiwshilari akademik J.Bazarbaevtin` ilimiy basshilig`inda "Ba`rkamal a`wladti milliy g`a`rezsizlik ideyasi ruwxinda ta`rbiyalawda qa`driyatlardin` orni ha`m a`hmiyeti"temasi u`stinde ilimiy-izertlew jumislarin alip bardi. 2005-2006 oqiw jilinda T.Qudaybergenova "Orta arnawli oqiw orinlarinda huqiqiy ta`lim na`tiyjeliligin arttiriwdin` pedagogikaliq tiykarlari" temasinda pedagogika ilimleri kandidati, A.Embergenov "A`jiniyazdin` etikaliq ko`z-qaraslari" temasinda filosofiya ilimleri kandidati da`rejelerin aliw ushin dissertatsiya jumislarin tabisli jaqlap shiqti ha`m ilim kandidatlari boldi.
2007-2008 oqiw jilinda A.Gulimov yuridika ilimleri kandidati da`rejesi ushin dissertatsiya jumisin tabisli jaqladi. Kafedrada jas oqitiwshilar menen bir qatarda ziyrek studentlerdi ilimiy-izertlew jumislarina, ilimiy do`gereklerge tartiwg`a da itibar qaratilg`an. Kafedrada J.Bazarbaevtin` basshilig`inda "Jas ideolog", T.Qudaybergenovanin` basshilig`inda "Jas huqiqtaniwshi" ilimiy do`gerekleri iskerlik ko`rsetpekte.
Kafedra professor-oqitiwshilari ta`repinen 2005-2009 jillar aralig`inda 5 metodikaliq qollanba, 6 oqiw qollanbasi ha`m sabaqliq, 4 monografiya basapadan shig`arildi. Olardan akademik J.Bazarbaevtin` qatnasiwinda jazilg`an baslawish klasslar ushin "A`depnama", orta arnawli okiw orinlari ushin "Shan`araq psixologiyasi" sabaqlig`in, kafedra alimlari ta`repinen tayarlang`an "Ruwxiyliq tiykarlari" (2009 j) oqiw qollanbasin, "A`yyemgi Oks da`r`yasinin` to`menindegi zardushtiylik dininin` izleri" (2007 j) monografiyasin, J.Bazarbaevtin` jeke avtorligindag`i "Danalig`i go`zzalliqqa ulasqan shayir", (2008 j) "Ruwxiyatimiz marjanlari, yamasa u`lgili el u`lkenin, o`rnekli el o`tkenin qa`sterleydi", (2008 j) A.Sultanovtin` "Qarakalpaq prozasinda Sh.Aytmatovtin` poetikaliq da`stu`rleri", "Ko`rkem a`debiyatta filosofiyaliq pikir" siyaqli miynetlerin atap o`tiwge boladi.